Ang karahasan na nakabatay sa kasarian laban sa mga kababaihang may karelasyong intimo ay madalas na isinasagawa nang unti- unti at sistematiko, may iba't ibang paraan na minsan ay paulit-ulit, may katindihan at kalubhaan sa paglipas ng panahon. Ang mga sumusunod ay ang mga pangunahing anyo ng isinagawang karahasan, na naisalarawan din sa pamamagitan ng mga salita ng ibang kababaihang nagdusa nito¹.

Karahasang sikolohikal

"Kapag may mga ulat tungkol sa mga femicide (pagpatay sa mga kababaihan dahil lamang sa kanilang kasarian), bumubulong siya sa akin na ganoon din ang  kahihinatnan ko at ang mga kababaihan ay dapat lamang na patayin"; "Kailangan mong laging magbihis ayon sa gusto ko, para mas maayos ka"; "Nakaka-inis ang iyong pagtawa"; "Kung gusto mo akong makasama, hindi mo kailangang makipag-usap sa iba"; "Kung wala ako, sino ang nakaka-alam kung ano ang maaari mong gawin "; "Marahas niyang winawasak ang mga bagay, nagbabanta na gagawin din niya iyon sa akin.".

Ang sikolohikal na karahasan ay nagpapahiwatig ng mga pag-uugali na nakakapinsala sa iyong pagkatao at pagpapahalaga sa sarili, sa posibilidad para sa iyong kagalingan, higit lalo kung patuloy: ang mga biro at panunukso para manghiya, mga banta, at lalo na kung may mga banta ng pisikal na pananakit, pagkontrol sa relasyon at pag-iwan, mga pang-iinsulto at pagmumura.

Karahasang pisikal

"Itinulak niya ako, ibinato ang mga bagay-bagay sa akin," "Lagi niya akong hinahatak, hinihila ang buhok ko, sinampal, sinipa at sinuntok ako; " Tinangka niya akong sakalin"; "Sinubukan niyang inisin ako gamit ang unan."

Ang pisikal na karahasan ay tumutukoy sa lahat ng mga pagsalakay na kinasasangkutan ng paggamit ng puwersa, tulad ng pagtulak, paghila sa buhok, pagsampal, pagpisil nang may puwersa, pagsuntok, pagsipa, pagbato ng mga bagay, pagsakal, pagsunog, pagsugat gamit ang mga armas. Nguni’t ang pisikal na karahasan ay nagpapahiwatig din, sa pangkalahatan, ng lahat ng mga pag-uugali na may intensyong magdulot ng pisikal na pinsala, tulad ng pagpilit o pag-udyok sa iyo na uminom ng alak at gumamit ng droga, o pagmanipula ng mga gamot o mga paggagamot na kailangan mong gawin.

Karahasang sekswal

"Pinilit niya akong makipagtalik sa paraang ayaw ko, hinihiya ako.", "Kung tatanggi ako sa pakikipagtalik, alam kong magagalit siya.", "Nang tangkain kong tumanggi, inakusahan niya na may iba ako.", "Sinasabi niya sa akin na asawa niya ako at tungkulin kong gawin ang gusto niya kapag nasa kama kami."

Ang karahasang sekswal ay tumutukoy sa anumang ipinapagawa sa iyong labag sa iyong kalooban, hindi mo alintana kung malinaw mong sinabi na ayaw mo o hindi mo ginawa ito dahil sa takot sa kung ano ang maaaring mangyari. Ang sekswal na karahasan ay ang pamimilit din sa mga hindi kanais-nais na pamamaraan, pagpapahiya at/o masakit na pagtatalik, ang obligasyon na makipanood at tuloy ipagawa ang mga pornograpikong materyal.

Karahasang pang-ekonomiya

"Wala akong karapatan sa bank account"; "Kinokontrol ang bawa’t gastusin ko"; "Hindi ko alam ang aming kalagayang pang-ekonomiya"; "Pinapirma niya ako ng mga kontrata bilang tagapanagot ng utang sa pangalan niya"; "Kailangan kong pasanin ang lahat ng gastusin ng pamilya, kung saan hindi siya nakikibahagi."

Ang karahasang pang-ekonomiya ay tumutukoy sa mga pag-uugali na maaaring magdulot para umasa ka sa usaping pang-ekonomiya o pagtakda ng mga hindi kanais-nais na responsabilidad tungkol sa ekonomiyang pampamilya: ang pagkontrol sa suweldo kung may nagtatrabaho ka o ang pagkontrol sa kita ng pamilya, na pumipigil sa iyo na gumawa ng anumang desisyon tungkol dito; pinilit kang tumigil sa trabaho o huwag maghanap ng trabaho; ang pagpilit na lagdaan ang mga dokumento o magsagawa ng mga inisyatibong pang-ekonomiya, na kung minsan ay mapanlinlang laban sa iyong kalooban.

Stalking at mga kilos na mapag-usig

"Sinusundan niya ako, kinokontrol ako, palaging pinagdududahan ang katapatan ko, lagi niya akong tinatawagan para malaman kung ano ang ginagawa ko, kung nasaan ako at sino ang kasama ko"; "Alam niya lagi kung nasaan ako, kinokontrol ang mga koneksyon ko at ang mga pakikipag-ugnayan ko sa social media."

Ang kontrol at pag-uusig ay maaaring isagawa sa pamamagitan ng iba't ibang pamamaraan: patuloy na mga tawag sa telepono o pagpapadala ng mensahe, na kung hindi ka sumagot alam mo ikagagalit niya, o sa pamamagitan ng pagkontrol ng mga paggalaw at mga pinupuntahan mo. Ang pagkontrol ay maaaring isagawa nang direkta (hal., nakita mong sinusundan ka, o na nagpapakita na lang sa mga lugar kung saan inaasahan niyang naroroon ka), sa pamamagitan ng ibang tao (hal., mga kapamilya, kapitbahay, kakilala) o sa pamamagitan ng mga digital na aparato (tulad ng mga App sa pagsubaybay sa kinaroroonan mo o pagmanman sa pamamagitan ng kamerang nagmamatyag).

Karahasan na pinadali sa paggamit ng mga digital na instrumento

"Tuwing aalis ako ng bahay gusto niyang mag-usap kami sa video call, na sinasabing hindi niya ako kailanman gustong iwanan"; "pinapadalhan ng mga mensahe ang mga taong nakikipag-ugnayan sa aking mga kuwento sa social media, tinatakot sila para lumayo sa akin"; "nagsulat siya ng mga email sa aking amo para siraan ako"; "nag-aalinlangan ako na naglagay siya ng GPS system sa kotse ko, dahil lagi niyang alam ang mga lugar na napuntahan ko"; "binantaan niya akong mag-post sa social media ng mga larawang kuha mula sa aming mga pagtatalik"; "nagsimula akong makatanggap ng mga tawag sa telepono mula sa ibang mga lalaki na humihiling sa akin na makipagtalik: nalaman ko na nagpadala siya ng ilang mga larawan at ang aking numero ng telepono sa mga grupo ng WhatsApp."

Ang mga digital na instrumento at mga platapormang panlipunan ay maaaring magamit upang mapalakas at gumawa ng higit pang malaganap na mga anyo ng karahasan, tulad ng pagkontrol, pagbabanta, paghihiwalay o paglalayo, paninirang-puri.

Iba pang uri ng karahasan at diskriminasyon laban sa mga kababaihan

Ang mga babaeng nakakaranas ng karahasan na nakabatay sa kasarian sa loob ng  isang relasyong intimo ay maaari ring nagkaroon ng karanasan ng iba pang mga anyo ng karahasan at diskriminasyon na nakaraan na, sa kasalukuyan, o pagkatapos ng kanilang relasyon, mula sa parehong lalaki o ibang tao. Ang molestiya at sekswal na karahasan, sapilitang pag-aasawa, pag-uusig o diskriminasyon batay sa kultura, relihiyon, nasyonalidad, kulay ng balat, pagkakakilanlan at oryentasyon sa kasarian, o pisikal na anyo o kapansanan, ay ilan lamang sa mga halimbawa.

Ang mga karanasang ito ay maaaring mahirap kaagad makita o mahirap makagawa ng paraan upang makalabas sa nasabing sitwasyon, halimbawa dahil sa takot kung ano ang maaaring isipin ng iba: "isang kahihiyan sa aking pamilya kung iiwan ko siya", "mas malaki ang kapangyarihan niya kaysa sa akin, walang maniniwala sa akin", "naka-asa ako sa kanya sa lahat ng ginagawa ko, hindi ko malalaman kung paano ang gagawin ko o kung sino ang makakatulong sa akin".

Ang iba pang mga anyo ng karahasan at diskriminasyon na maaaring pinagdusahan mo, ay maaari ring gamitin ng marahas na lalaki upang sisihin at pagbantaan ka: "palagi niyang ipinapaalala sa akin na siya ang nagligtas sa akin mula sa aking dating sitwasyon, na nagdala sa akin sa kung nasaan ako ngayon, hindi ko siya maaaring iwanan", "pinili kong pakasalan siya kahit labag sa kalooban ng aking pamilya,  Hindi ako maaaring umatras"; "Tinatakot niya ako kung magsusuplong ako sa mga awtoridad o ibubunyag sa aking pamilya ang mga detalye ng aking nakaraan na magpapalayo sa kanila sa akin."

¹ Dapat tandaan na ang mga paglalarawang iniulat ay may kinalaman sa mga karanasan ng kababaihan at sa sukatang panlipunan ng karahasan at ang mga paglalarawang ito ay hindi kinakailangang tumutugma sa mga uri ng krimen na nakasaad sa batas.

Sa pangkalahatan, ang sunod-sunod na iba't ibang anyo ng karahasan (sikolohikal, pang-ekonomiya, pisikal at sekswal) ay waring isang siklo na nagiging mas matindi, madalas at malubha. Anuman ang anyo ng karahasan, ang layunin ay nananatiling ganoon pa rin: dominasyon at pagkontrol sa mga kababaihan, na ipinanganak sila bilang pag-aari, isang bagay lamang na walang anumang posibilidad na pumili ayon sa kanilang kagustuhan.

Ang umiikot na karahasan sa loob ng tahanan

Ang mekanismo na lubusang tumutukoy sa mga yugto ng isang kondisyon ng karahasan sa tahanan ay tinatawag na "spiral o umiikot na karahasan.

Ang mga yugto ng umiikot na karahasan ay maaaring magpakita ng higit na paglala  at pagkatapos ay “maging kahalo na”: ang pag-ikot na ito na nagpapatuloy sa paglipas ng panahon ay magpapalito sa iyo na maaaring dahilan para maliitin mo ang panganib, dahil baka hindi pa ito isang anyo ng  pisikal na karahasan, o kaya ay suriin mo na ang pangyayari ay "kontrolado" mo, dahil na din sa paghahalili ng mga episodyo ng mas malaking tensyon sa iba ng huwad na pagkakasundo at na "tila kalmadong" sitwasyon.
Ngunit masinsinan nating tingnan kung ano ang mga yugto na bumubuo sa paikot na karahasan.

Pananakot:

"Mahal na mahal niya ako, sinasabi niya sa akin na ako ang kanyang buhay, na ako ay kanya, ipinadarama niya sa akin na mahalaga ako, nagmamalasakit siya sa akin, seloso siya sa lahat"; "sinasabi niya sa akin na hindi ko ginagawa ang mga sinasabi niya, dahil hindi sapat ang pagmamahal ko sa kanya, nagbabanta siyang iiwan ako."

Ang lahat ng mga pag-uugaling ito ang naglalagay sa iyo sa isang lugar para mabuhay ka ng may patuloy na takot, sa ilalim ng banta na iiwan ka. Ang mga pananakot ay anyo ng pagkontrol at pamimilit, malinaw na mga banta, pinsala sa mga bagay at pagkontrol sa ekonomiya (tulad ng maghangad na bayaran ang iyong suweldo sa kanyang bank account o pagpigil sa iyo sa malayang paggastos mo ng iyong mga sariling pinagkikitaan).

Pagbubukod/paglalayo:

"Ayaw niyang makilala ko ang mga kaibigan ko, naiinis siya kung gusto kong lumabas, pinipigilan niya akong gawin ang gusto ko"; "Kinumbinsi niya akong tumigil sa trabaho para ilaan ang aking sarili sa aking pamilya"; "Sinasabi niya sa akin na inaaargabyado siya ng pamilya ko at kaya gusto kong makasama sila ay dahil hindi ko siya mahal"; "Naiinis siya kung kausap ko mga kaibigan o pamilya ko at kung nais ko silang makasama."

Sa dahilan ng selos, na may direktang paratang laban sa mga taong malapit sa iyo o sa pamamagitan ng mga pagbabanta, ikaw ay unti-unting nalalayo sa taong sinasanggunian mo (pamilya, mga kaibigan, mga kasamahan sa trabaho), limitado ang iyong kalayaan. Sa ganitong paraan, ang iyong partner lamang ang nagiging sentro ng iyong buhay.

Pagpapababa ng halaga:

"Iniinsulto niya ako, sinasabi sa akin na ako ay hangal at walang kabuluhan"; "Inilalagay niya ako sa kahihiyan, minamaliit ako, sinasaktan ang loob ko kahit sa harap ng ibang tao"; "Sinasabi niya sa akin na wala akong kakayahang maging isang ina".

Ito ang lahat ng mga pag-uugali na maaaring magbunga ng mga pakiramdam nang kakulangan, pagkawala ng pagpapahalaga sa sarili, pagkawala ng sariling katiwasayan. Ang mga pang araw-araw na panlalait, negatibong pagpuna na maaaring humantong na ipalagay mong "totoo " ang pananaw ng iyong partner, ang hindi pagkakaroon ng pagkakataon na magbigay ng alternatibong opinyon mo dahil sa pagtatangka ng paghihiwalay na nakalatag na.

Segregasyon o paglalayo:

"Nagagalit siya kung may makatinginan ako sa kalye, ayaw niyang lumabas akong mag-isa "; Nililimitahan ang aking sariling paggalaw"; "Kapag lumabas siya, dinadala niya ang susi ng bahay, kung lalabas ako ay at hindi ko alam kung paano ako makabalik"; "Hindi ako maaaring pumunta nang mag-isa sa doktor o pedyatrisyan, kailangang kasama ko siya palagi o ng isang makakasama na siya ang magpapasya kung sino"; "Hindi ko pwedeng ihatid ang aking mga anak sa paaralan ng nag-iisa, ni hindi ako maaaring makipag-usap sa mga guro".

Sa pagkakataong ito, ang iyong panahon at mga espasyo ay pinamamahalaan at itinakda ng iyong partner na may ganap na kontrol sa iyong buhay, kaya nililimitahan ang iyong kakayahan sa pansariling pagpapasiya.

Mga huwad na pagkakasundo:

"Tapos humingi ng paumanhin sa akin, nangako sa akin na hindi na niya uulitin. Sinabi niya sa akin na ninerbyos siya at hindi siya mabubuhay kung wala ako, na ako ang buong buhay niya. Pinuno niya ako ng pansin, naging malambing siya sa akin... kahit sa kama ay maganda ang nangyari. Binigyan niya ako ng isang mahalagang regalo para patawarin ko siya"; "tinawagan niya ako, umiiyak siya at nangako sa akin na magpapatulong siya para sa ikabubuti ng pamilya."

Sa bahaging ito na maaaring mangyari bilang isang resulta ng mas malubhang pangyayari ng karahasan, ang lalaki ay nagpapatupad ng kanyang panlalansi upang lituhin ka, upang panatilihin ka sa loob ng pilipit na sitwasyong ito, na pinapaniwala ka na siya ay nagsisi sa mga nangyari, na ang mga episodyo ng karahasan ay bunga lamang sa "isang matinding galit", ng isang nakakapagod na araw, ng selos, na naging reaksyon dahil sa ginawa mo at hindi na mauulit pa sa hinaharap. Ang karahasan ay hindi kailanman magpapatuloy hanggang ang mapang-abusong partner ay may mga sandali ng paglilihis tulad ng huwad na pagsisisi at normalidad sa mga oras ng pagsalakay. Ang hindi pagpapatuloy ng karahasan ay isa sa mga dahilan kung bakit maaaring mahirap itong kilalanin at makapagpasya kung papaano lalabas sa ganitong sitwasyon.

Pananakot gamit ang mga anak:

"Sinasabi niya sa akin na baliw ako, na wala akong trabaho, na kung magpapasya akong umalis ay hindi niya kailanman hahayaan ang aking mga anak na tumira sa akin"; "Nagbanta siyang kukunin ang mga bata, na hindi ko na sila makikita pang muli".

Kung mayroon ka o may mga anak kayo, madalas silang magamit bilang instumento upang gumawa pa ng higit na kapangyarihan sa iyo, tulad ng pagbabanta na lumayo ka sa kanila kung magpapasya kang iwanan siya.

Hindi ka nag iisa, hindi mo kasalanan, makakalabas ka sa karahasan: ang bawa’t babae ay may karapatang mabuhay nang malaya sa panghihiya, panliligalig o karahasan.

Ang pagpapalaya sa iyong sarili mula sa karahasan, pananakot, pag-uusig, blackmail, kahihiyan, maling pangako, pagdadahilan at kasinungalingan ay hindi isang madaling landasin. Maraming mga kadahilanan na maaaring magparamdam sa isang babaeng napipilitang namumuhay sa loob ng mapang-abusong relasyon.  Ang mga bata, ang bahay, ang paghatol at panggigipit ng iba, ang takot na mapag-isa, ang takot sa higit na mabigat at walang-awang karahasan, ang takot na mawala ang mga anak o kung ano ang maaaring mangyari sa kanila, lahat ng mga totoong dahilan na ito ang nag-aantala sa anumang hakbangin para humingi ng tulong o lumayo.

Tulad mo, maraming kababaihan sa Italya at sa buong mundo ang nakakaranas ng parehong sitwasyon ng karahasan. Ang mga kwento ng buhay ay madalas na magkakatulad at sa iba't ibang konteksto at dinamika, pinag-iisa ang mga ito sa kawalan ng kakayahan sa pagmamanipula, sapilitang pagpapatupad sa bawat aspeto ng buhay, at sa mga karahasang pisikal, sa salita at madalas din ay sekswal.
Gayunpaman, marami at dumarami ang mga kababaihan na naghihimagsik at matapang na nagpasya na putulin ang relasyon at isakamay nila ang kanilang buhay. Minsan ginagawa nila ito ng mag-isa, pinagbabayaran ang halaga ng matinding pagkahiwalay sa lipunan, kung minsan mayroon silang isang pamilya na tumutulong at sumusuporta sa kanila sa materyal na pamamaraan, ngunit maraming iba pang mga pagkakataon na pumupunta sila sa isang Anti-Violence Center, ang pulisya, at sa mga serbisyong panlipunan.

Ang mga Anti-violence Center ay may karanasan at kadalubhasaan upang pamahalaan ang mga kaso tulad ng sa iyo, may mga dalubhasang manggagawang panlipunan na kaya kang suportahan sa mga pagpipilian mong gagawin sa iyong paglabas mula sa karahasan. Maaaring lumayo sa karahasan, sa tulong ng mga Anti-Violence Centers. Ang paggalang sa iyong mga desisyon, sa iyong karapatang pansarili at ng iyong mga mahal sa buhay ang mga batayan ng gawain ng mga Sentro. Maaari kang tulungan ng mga Anti-violence Centers sa pagbuo ng mga alternatibong hakbang laban sa karahasan, ang posibilidad na pumili para magsimula kang muli upang palayain ang iyong sarili mula sa mga kadena ng mga taong palaging gustong magpasya para sa iyo.

Hanapin ang Anti-Violence Center na pinakamalapit sa iyo sa pamamagitan ng pagtawag sa toll-free na numero 1522 o pagkonsulta sa mapa ng Anti-Violence Centers (https://www.1522.eu/mappatura-1522/).

Sa anumang oras, kung sa tingin mo ay nasa panganib ka o ang iyong mga anak, ay maaaring tumawag sa 112 at sabihin sa kanila kung ano ang nangyari sa iyo, nang hindi mo ikahihiya o ikatatakot.